الرئيسية
من طرف 
أنا نبي رأيكم في موضوع مهم شوية
الموضوع هو أن الشباب أغلبهم منبهرين برموز غربية
مثل جيفارا وغيره
ولما تقول له بس جيفارا شيوعي وأنت مسلم ومفروض تعتز برموز إسلامية من عندك
يقول لك شن دخل هذا بهذا وان جيفارا رجل مناضل وأن الواحد مفروض يقتدي بيه لأنه مناضل وأيضا مناضل كما أنه مناضل .... إلخ
ويبقي يبرملك على نفس النقطة
انا مش نقلل من قيمة جيفارا أو أي واحد مناضل أو من رموز الغرب
ولكن نحن كمسلمين بالدرجة الأولى وكعرب لازم ننبهر ونقتدي برموزنا
والتاريخ الإسلامي مليان بالمناضلين والأبطال اللي حققوا أهدافهم
وماتوا بسبب أهدافهم هذه
أنا مانبيش نقول الرسول عليه الصلاة والسلام
لأنه ما يختلفش فيه اثنين –حتى من الغير مسلمين- أنه أفضل إنسان في التاريخ
والرسول عليه الصلاة والسلام مش للمقارنة
ولكن نقول لك عمر بن الخطاب اللي حكم نصف العالم وثوبه مرقع
ومات وهو يصلي بالناس صلاة الفجر
أو طارق بن زياد اللي حرق سفن الجيش
وقال لهم البحر من ورائكم والعدو من أمامكم
ولولا الحركة هذه ما فتحش الأندلس
أو خالد بن الوليد سيف الله المسلول
العقلية العسكرية الفذة اللي ما انهزمش مرة في حياته
واللي يتحدثوا عنه الغرب لعند توا
واللي مات على فراشه لأنه ما حدش قدر يقتله مع كثرة المعارك اللي دارهن
ممكن فيه حد يقول لي هضوما صحابة مش كيفنا
هضوما عاشوا مع الرسول و و و ... إلخ
باهي يا سيدي انا نقولك ناس معاصرين عظماء
زي الشيخ الشهيد عمر المختار اللي كان عمره سبعين
وحارب دولة عظمى ببندقية من خلوات تحفيظ القرآن
يعني إذا كان تشي جيفارا –ناضل- وهو شاب ومات وعمره 39
عمر المختار ناضل وهو شايب ومات وعمره فوق السبعين
يعني مافيش وجه مقارنة بكل
وفيه مالكولم إكس أو الحاج مالك شباز كما سمى نفسه بعد إسلامه
الداعية الإسلامي الأمريكي من أصل أفريقي
اللي ناضل من أجل حقوق الأمريكان السود وناضل ضد العنصرية
واللي أغتيل بسبب قضيته
واللي له أنصار زي مارتن لوثر كينج -المناضل الأسود المشهور-
اللي كان من أكثر الخطابيين تأثيرا في تاريخ أمريكا
وإلا لأن جيفار أبرز العداء لأمريكا وما خافش منها يبقى أحسن مناضل
توا نص العالم يبرز في العداء لأمريكا وما يخافش منها
أنا ما ننقص في حق جيفارا أو نتفه في اللي داره
بالعكس انا قريت عنه ونحترم فيه جدا
لأنه راجل كان طبيب وكان من عائلة غنية ولكنه ترك كل هذا
من أجل النضال ومن أجل الحرية
ولكن هذا ما يعنيش أني ننبهر بيه
ونعلق صورته في غرفتي أو نلبس ملابس عليها صورته
أو .. أو .. أو .. إلخ من الحاجات اللي نشوفوا فيهن توا
وفي نفس الوقت حبيت نبين أن الإسلام دين العظماء
عموما فكرة وحبيتها توصل وياريت رأي الأعضاء فيها
تحياتي
